Per ricordare zio Mimi - Domenico Medaglia - Aiello 19 ottobre 1916 - 29 luglio 2011 Poesia - Juochi bielli di Domenico Medaglia Ccu lu sule o ccu llu friscu, allu largu e San Franciscu, jocan tanti quatrarielli, piccirilli e grandicielli; su ' nna frotta e gridazzari, cum 'e loru un cce su ' pari O de sira o de juornu, fanu chiassu ntuornu ntuornu. Fanu tanti juochi bielli: a scappare cum’ acielli, all’ammuccia sutt’u muru, strittu all’ uocchi u maccaturu. Io me scialu a lli guardare, ccu na voglia de penzare ca quand 'ere piccirillu io jocave allu stirillu alla palla e ' pezza e' lana ca zumpave cumu a rana; allu strumbulu, allu rullu alle stacce ccu llu zullu. Quandu pue ere maturu io jocave a battamuru ccu tri sordi e nna rimella. Chilla vita ere cchiu bella! Vita bella de quatraru, sempre lustra cumu u faru. Ohi cchi tiempi,e cchi etate, senza viernu e sempre estate! Mue ca signu allu tramuntu, a vecchiaia a cchine a cuntu?